കേരള കോൺഗ്രസി (എം)നു വഴങ്ങി മധ്യമേഖലാ ജാഥ മാത്രം മാറ്റി യുഡിഎഫിൽ ഒത്തുതീർപ്പ്. മറ്റു മൂന്നു മേഖലാ ജാഥകളും മുൻ തീരുമാനമനുസരിച്ചു 19 മുതൽ 25 വരെ നടത്താൻ യുഡിഎഫ് കക്ഷിനേതാക്കളുടെ യോഗം തീരുമാനിച്ചു. കോട്ടയം, എറണാകുളം, ആലപ്പുഴ, ഇടുക്കി ജില്ലകൾ ചേർന്നുള്ള മധ്യമേഖലാ ജാഥ 27ന് ആരംഭിക്കും.
മന്ത്രി കെ.എം. മാണിക്കെതിരായ ബാർ കോഴക്കേസ് അന്വേഷണം തീരാതെ ജാഥകൾ വേണ്ടെന്ന കേരളകോൺഗ്രസ് (എം) നിലപാട് മാണിയുടെ അസാന്നിധ്യത്തിൽ ജനറൽസെക്രട്ടറി ജോയി ഏബ്രഹാം എംപി വ്യക്‌തമാക്കി. എന്നാൽ അന്വേഷണവും ജാഥയും കൂട്ടിക്കുഴയ്‌ക്കാനാവില്ലെന്നു കെപിസിസി പ്രസിഡന്റ് വി.എം. സുധീരൻ അഭിപ്രായപ്പെട്ടു. നാലു ജാഥയും മുൻതീരുമാനപ്രകാരം നടത്തണമെന്നാണു കെപിസിസി തീരുമാനമെന്നും അറിയിച്ചു.
യുഡിഎഫ് കൂട്ടായി തീരുമാനമെടുത്ത പ്രചാരണപരിപാടി എല്ലാ തയാറെടുപ്പും ആരംഭിച്ചശേഷം മാറ്റിവയ്‌ക്കേണ്ടതില്ലെന്ന അഭിപ്രായമാണു പൊതുവെ ഉണ്ടായത്. മധ്യമേഖലാ ജാഥയുടെ ഉദ്‌ഘാടകനായ മാണി വ്യക്‌തിപരമായ അസൗകര്യം തന്നെ അറിയിച്ചിരുന്നുവെന്നു മുഖ്യമന്ത്രി ഉമ്മൻ ചാണ്ടി അപ്പോൾ അറിയിച്ചു. ദുബായ്‌ക്കു തിരിക്കുന്നതും പാർട്ടിയുടെ കൺവൻഷനുകൾ നടക്കുന്നതുമാണു മാണി ചൂണ്ടിക്കാട്ടിയത്. മാണിയെപ്പോലെ മുതിർന്ന നേതാവിന്റെ ആവശ്യം പരിഗണിക്കണമെന്ന് അപ്പോൾ മുസ്‌ലിംലീഗ് അഭിപ്രായപ്പെട്ടു. സുധീരനും എതിർത്തില്ല.
എങ്കിൽ 22നോ 23നോ ആ ജാഥ തുടങ്ങാമെന്നു മുഖ്യമന്ത്രി അഭിപ്രായപ്പെട്ടു. മാണിയുമായി ആലോചിച്ച് അറിയിക്കാമെന്നു ജോയി ഏബ്രഹാമും പ്രതികരിച്ചു. തുടർന്നു ടെലിഫോണിൽ ആശയവിനിമയം നടത്തിയശേഷം 26 നിർദേശിച്ചുവെങ്കിലും അന്നു കോഴിക്കോട്ടു രാഹുൽ ഗാന്ധി പങ്കെടുക്കുന്ന പരിപാടിയുള്ള കാര്യം ചൂണ്ടിക്കാട്ടപ്പെട്ടു. തുടർന്നാണു പിറ്റേന്ന് ആരംഭിക്കാൻ തീരുമാനിച്ചത്. മധ്യമേഖലാ ജാഥാ ക്യാപ്‌റ്റനായി മുൻ മന്ത്രി സി.എഫ്. തോമസിനെ നിശ്‌ചയിച്ചുവെങ്കിലും അദ്ദേഹത്തിന് ആരോഗ്യ പ്രശ്‌നങ്ങളുള്ളതിനാൽ മറ്റൊരാളെ നിയോഗിക്കുമെന്നു ജോയി ഏബ്രഹാം അറിയിച്ചു. സി.എഫ്. തോമസിന്റെ പേരാണു നേരത്തെ തീരുമാനിച്ചിരുന്നതെന്നു യുഡിഎഫ് കൺവീനർ പി.പി. തങ്കച്ചനും പ്രതികരിച്ചു.
മാണി വ്യക്‌തിപരമായ അസൗകര്യം പറഞ്ഞപ്പോൾ അതു സമ്മതിക്കണമെന്ന വികാരമാണു യോഗത്തിൽ ഉണ്ടായതെന്നു തങ്കച്ചൻ അറിയിച്ചു. മറ്റെല്ലാ ജാഥയുമായും കേരള കോൺഗ്രസ് സഹകരിക്കും. കേസന്വേഷണത്തിന്റെ പേരിലാണോ ജാഥ മാറ്റിവയ്‌ക്കണമെന്നു മാണി ആവശ്യപ്പെട്ടതെന്നു ചോദിച്ചപ്പോൾ, അന്വേഷണത്തെക്കുറിച്ച് ആരും ഒന്നും പറഞ്ഞില്ലെന്നായിരുന്നു മറുപടി.
എല്ലാ ജാഥകളും മാറ്റിവയ്‌ക്കണമെന്നാണു കേരള കോൺഗ്രസ് ആവശ്യപ്പെട്ടതെന്നു ജോയി ഏബ്രഹാം സ്‌ഥിരീകരിച്ചു. അങ്ങനെ ചെയ്‌തതുകൊണ്ട് ഒരു അപകടവും സംഭവിക്കുമായിരുന്നില്ല. ജാഥ നല്ല രീതിയിൽ നടത്തണം എന്ന ആഗ്രഹമേ കേരള കോൺഗ്രസിനുള്ളു. കേസുമായി ഇതിനു ബന്ധമില്ല. സി.എഫ്. തോമസിന് അസൗകര്യം ഉള്ളതിനാൽ ക്യാപ്‌റ്റൻ ജോസ് കെ. മാണിയോ മറ്റാരെങ്കിലുമോ ആകാമെന്നും ജോയി വ്യക്‌തമാക്കി. മധ്യമേഖലാ ജാഥ മാറ്റിവച്ചതു തെറ്റായ തീരുമാനമാണെന്നും അണികളുടെ ആവേശം ചോരാൻ അതു കാരണമാകുമെന്നും കേരള കോൺഗ്രസ് (ജേക്കബ്) ചെയർമാനും ജാഥാ ഉപക്യാപ്‌റ്റനുമായ ജോണി നെല്ലൂർ പ്രതികരിച്ചു.
മാണിയുടെ സമ്മർദത്തിനല്ല, വ്യക്‌തിപരമായ അഭ്യർഥനയ്‌ക്കാണു വഴങ്ങിയതെന്നാണു കോൺഗ്രസ് കേന്ദ്രങ്ങൾ വിശദീകരിക്കുന്നത്. ദുബായ്‌ക്കു തിരിച്ച കെ.എം. മാണി 17നോ 18നോ തിരിച്ചെത്തും. അപ്പോൾ 19ന് ആരംഭിക്കാനിരുന്ന ജാഥ ഉദ്‌ഘാടനം ചെയ്യുന്നതിന് എന്ത് അസൗകര്യമാണുള്ളതെന്ന ചോദ്യത്തിനു വ്യക്‌തമായ ഉത്തരമില്ല.
.jpg)
